Mat 6 | HMO | STEP | “Umui naria namonamo, umui emui bogahisihisi karadia be taunimanima edia vairanai umui karaia lasi, idia itaia totona. Bema unai bamona do umui karaia, emui Tamana guba dekenai ia noho dekena amo umui be davana lasi.

Matthew 6

Taunimanima do umui durua dalana

1 “Umui naria namonamo, umui emui bogahisihisi karadia be taunimanima edia vairanai umui karaia lasi, idia itaia totona. Bema unai bamona do umui karaia, emui Tamana guba dekenai ia noho dekena amo umui be davana lasi.

2 “Unai dainai, harihari gauna ogogami taudia dekenai umui henia neganai, umui emui toana umui hedinaraia lasi mai hekokoroku danu, guriguri koikoi taudia ese dubu dekenai bona hanua ena huanai idia karaia bamona, taunimanima ese idia hanamodia totona. Umui lau hamaoroa momokani, edia davana ibounai idia abia vadaeni. 3 To harihari gauna oi henia neganai, oi sibona mo oi karaia hunia dala bamona, vadaeni oiemu turana momokani ese danu oiemu henia gauna do ia diba lasi. 4 Vadaeni oiemu Tamana ese oiemu henia karadia, hunia dekenai oi karaia gaudia ia itaia dainai, edia davana do ia henia oi dekenai.

Iesu ese guriguri dalana ia hadibaia

5 “Umui guriguri neganai, koikoi taudia bamona umui karaia lasi, badina be idia ura dubu dekenai bona dala edia huanai idia gini, vadaeni idia guriguri, taunimanima ese idia itaia totona. Umui lau hamaoroa momokani, edia davana ibounai idia abia vadaeni. 6 To oi guriguri neganai oiemu ruma dekenai oi vareai, iduara oi koua, oiemu Tamana, hunia gabuna ia noho dekenai do oi guriguri henia. Vadaeni oiemu Tamana ese hunia gabuna dekenai oi sibona oi karaia gauna ia itaia noho, bona ena davana do ia henia oi dekenai.

7 “Umui guriguri neganai, hereva kava momo do umui gwauraia lou, gwauraia lou lasi, Dirava diba lasi taudia bamona, badina be idia laloa edia hereva momo dainai, Dirava ese idia do ia kamonai. 8 Idia danu do umui hegeregere lasi, badina be emui Tamana guba dekenai ia noho, be umui ura gaudia ia diba vadaeni, do umui noinoi henia lasi neganai.

9 “Unai dainai, inai bamona do umui guriguri:

“ ‘Aiemai Tamana e, guba dekenai oi noho,
oiemu ladana do ai hahelagaia.
10 Oiemu Basileia do ia mai,
oiemu ura gauna tanobada dekenai do ai karaia,
guba dekenai idia karaia bamona.
11 Hari dina aiemai aniani mani oi henia ai dekenai.
12 Aiemai dika mani oi gwauatao,
badina be ai dekenai idia hadikaia taudia edia dika ai gwauatao.
13 Dibagani dika gabuna dekenai ai do oi hakaua vareai lasi,
to Satani ena imana dekena amo do oi hamauria ai.’

14 “Badina be bema taunimanima edia dika umui gwauatao neganai, emui Tamana, guba dekenai ia noho ese emui dika danu do ia gwauatao. 15 To bema taunimanima edia dika umui gwauatao lasi, emui Tamana ese emui dika danu do ia gwauatao lasi.

Aniani ania lasi ena taravatu

16 “Aniani lasi taravatu umui karaia neganai, umui emui vairana dekenai lalohisihisi toana umui hedinaraia lasi, guriguri koikoi taudia bamona. Badina be edia vairana dekenai lalohisihisi toana idia atoa, idia hitolo bamona, taunimanima do idia itaia totona. Umui lau hamaoroa momokani, edia davana idia abia vadaeni. 17 To oi be aniani oi ania lasi neganai, oiemu kwarana dekenai dehoro do oi atoa, oiemu vairana danu do oi huria. 18 Vadaeni taunimanima be do idia diba lasi oi be aniani oi ania lasi noho, to oiemu Tamana ese hunia gabuna dekenai ia noho, be do ia diba. Vadaeni oiemu Tamana ese hunia gabuna dekenai oi sibona oi karaia gauna ia itaia noho, bona ena davana do ia henia oi dekenai.

Emui kohu umui haboua guba dekenai

19 “Inai tanobada dekenai kohu do umui haboua lasi, iniseni be manumanu ese dabua idia ania ore, bona raraka ese auri ia hadikaia, iniseni danu henaoa taudia ese ruma idia makohia bona gau idia henaoa. 20 To umui emui kohu be guba dekenai do umui haboua, unuseni be manumanu bona raraka ese gau idia hadikaia lasi, unuseni danu henaoa taudia ese ruma idia makohia diba lasi, bona gau idia henaoa diba lasi. 21 Badina be umui emui kohu idia noho gabuna dekenai, umui emui kudouna danu unuseni ia noho.

Tauanina ena diari

22 “Tauanina ena lamepa be matana, unai dainai bema oiemu matana ia namo, oiemu tauanina ibounai do ia mai diari danu. 23 To bema oiemu matana ia dika, oiemu tauanina ibounai do ia dibura. Unai dainai, bema diari oiemu lalona dekenai ia noho gauna do ia dibura, inai dibura be do ia bada momokani.

Taunimanima be biaguna rua dekenai gaukara diba lasi

24 “Tau ta ese biaguna rua edia hesiai gaukara ia karaia diba lasi. Badina be ta do ia badu henia, to ta be do ia lalokau henia, o ta be do ia abia dae, ma ta be do ia abia dae lasi. Dirava bona kohu momo danu nega tamona edia hesiai gaukara do oi karaia diba lasi.

Laloa hekwarahi bona laloa momo kara

25 “Unai dainai umui lau hamaoroa, mai gari danu umui laloa momo lasi emui noho mauri dekenai, dahaka do umui ania, o dahaka do umui inua, o tauanina ena dabua dekenai. Mauri be gau badana, to aniani be gau maragi, ani? Tauanina ese be dabua ia hanaia, ani? 26 Ataiai manu mani umui itaia. Idia be hadoa lasi, idia geia lasi, naria gabuna dekenai aniani idia haboua lasi. To emui Tamana guba dekenai noho ese unai manu ia naria namonamo. Umui ese manu umui hereaia, ani? 27 Umui daika be ena laloa hekwarahi dekena amo iena mauri ena nega sisina do ia halataia diba, a?

28 “Bona dahaka dainai dabua totona umui laloa momo? Tano ena herahera edia tubu dalana mani umui itaia, idia gaukara lasi, dabua idia turia lasi. 29 To umui lau hamaoroa, Solomona be mai ena kohu momo, to iena dabua be herahera ta ena hairai hegeregerena lasi. 30 Oibe, tano ena avadia, hari idia noho, bona kerukeru lahi dekenai do idia negea, to Dirava ese unai gaudia edia hairai ia henia. Be, ia ese umui dekenai danu dabua do ia henia namonamo lasi, a? Umui abidadama maragimaragi taudia e! 31 Unai dainai, emui lalona idia hekwarahi lasi. Umui hereva lasi, ‘Dahaka do ai ania?’ O, ‘Dahaka do ai inua?’ O, ‘Dahaka dabua do ai atoa?’ 32 Bese idauidau taudia ese unai gau ibounai idia tahua noho. To emui Tamana guba dekenai ia noho be ia diba, umui ura gaudia ibounai be unai. 33 To umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia. 34 Umui emui lalona do idia hekwarahi lasi kerukeru totona. Badina be kerukeru ese sibona ena metau do ia huaia. Bema umui laloa momo vaira dinadia totona, unai dina edia hekwarahi do umui habadaia sibona.”